شد اللحاف ... شعر .. يحيى أبو الليف ..

عايزني أرجع تانى أشد اللحاف والبطانية ...
آخد تعسيلة واتكتم وأبقى رزية..
أدفس راسي في التراب وأبيع القضية ...
ولا أقول ثورة ولا حتى حرية ...
تبقوا عايزينى أهدى وأبيع القضية ...
طول عمرنا هاديين متمرمطين في البلد ديا ..
ومحكمة ...
قالوا عليها محكمة ...
الكل فيها يدافع يقول واشتغلت المكلمة ..
القاتل بقي ملاك والقاتل أصبح أنا ...
وقت الحساب بس كله افتكر ربنا ...
توبة ورا توبة وضاعت المظلمة ...
فرقعة عملت خناقة واتلمت الحتة ...
مخلوع يقول بلادي عزيزة وغناوي متركبة ...
وعادلي يقول قرأن وسرقة وقتل وربا ...
واتنين شاي وشيشة لرئيس المحكمة ...
وقرفة وينسون للى قاعد واللى ورا ..
واللى اعصابة بايظة ومتهدمة ...
وكأنها قاعدة سمر اتلمت على مصطبة ...
كدب ونفاق ورياء وعصابة متملعنة ...
وأهي هيا ديا المحكمة ...
أحكام تتأجل وتتأجل .. خطة يا سيدي ومترتبة ..
انتخابات رئاسة وقالولنا في ستة ...
سٌلطة تتسلم برده في ستة..
وعصابة تتحاكم برده في ستة ...
وقاض معاش برده في ستة ...
وشعب يطلع روح أبوه لغاية ستة ..
وكأننا معمول لنا عمل على شهر ستة..
لا عمري هرجع أنام ولا أنسى القضية ...
ومهما كان الصعب بلادنا معدية ...
لا هتقتلوا فيا الأمل ولا الحرية ...
ولا عمري أخاف ظلمكم ولا كدبكم ليا ..
مش هخاف ولا اشد تانى البطانية ..
ولا هتكتم وابقى رزية ...
لو قطعتوني حتت مش هبيع القضية ...
حتى لو كان فيها محاكمة عسكرية ....